Informazione
 
 

Movit su laboratòriu in lìngua sarda “Mapas de comunidadi"

12 02 2021  - 

Cenàbura 12 de friàrgiu, a ora de is cincu de merii, s’at a fai in Zoom sa presentada de su laboratòriu  “Mapas de comunidadi”, su primu de tres laboratòrius in lìngua sarda chi sa Regioni at finantziau a s’Unioni de Comunus de is Fenìtzius. Su laboratòriu, propostu de s’Assòtziu sardu contras de s’emarginatzioni (ASCE Onlus), bolit essi unu caminu a cumoni, po contai su territòriu.

Cun is mapas, is comunidadis nd’ant a podi fai bessiri a pillu sa trama de acàpius chi ponint paris personis, logus, sabidorias, arregordus e pensamentus. A su laboratòriu ddoi ant a podi pigai parti giòvunus e mannus chi bolint chistionai su sardu, assòtzius, consultas de giòvunus, cambaradas culturalis chi bivint e traballant me in su territòriu de s’Unioni de Comunus de is Fenìtzius (Biddobrana, Prammas, Sabarussa, Siamaiore e Santa Justa).

Su laboratòriu s’at a ispoddiai cun 15 atòbius de 2 oras donniunu, intra de is mesis de martzu e de làmpadas 2021, me in is biddas de s’Unioni de Comunus de is Fenìtzius.

Po ddoi pigai parti si podit scriri a agoa.srd@gmail.com.

Po ndi sciri de prus, S’Unioni e ASCE ant cuncordau una presentada in Zoom po cenàbura 12 de friàrgiu, a is 5 de merii. Ddoi ant a pigai parti:

Federica Tendas e Claudio Orrù (Agoa, crica de circa – ASCE onlus)

Maria Giovanna Caddeo (Responsàbili de s’Àrea amministrativa de s’Unioni de Comunus de is Fenìtzius)

Antoni Nàtziu Garau (Sportellu de sa lìngua sarda de s’Unioni de Comunus de is Fenìtzius)

Liberi Sogni Onlus (Mapas de comunidadi de is provìntzias de Lecco, Monza – Brianza e Bergamo).

(a.i.g.)